Mei virtueller Chor

Wea's endressierd:

Nochdem weaga de Corona-Beschrengunga koine normale Chorproba mai 
meeglich warad, han i vor em Juni 2020 an virtuella Chor gründad.

Verschiedene Xangvrei händ probierd, z.B. iber Video-Konferenz-Software 
so a Ard Sengschdond abzuhalda, aber 's hod sich schnell rausgschdelld, 
dass dees us technische Gründ ed gohd, weil's nia synchron wird 
(Stichword: Latenzzeit).
Aber ma ka Audio-Dateia aufnemma ond dia synchronisiere, vorausdsedsd, 
dass älle gleich schnell sengad, was ma mid ma Playback sicherschdella ka.

En dem Chor sengad Laia-Sengerinna ond -Senger noch ma Playback ond 
nemmad ihr'n G'sang uf ma Smartphone auf. Dia Aufnahma werrad zo mir 
g'schiggd ond i synchronisier, bearbeide ond verarbeide dia Sound-Dateia 
zo ma mehrschdimmiga Chor.

Do a virtueller Chor ischd nadierlich koi vollschdändiger Ersads für a 
"richdiga" Chorbrob', aber alloi zo ma Playback zom senga machd Schbass 
ond fördrad d individuelle Fähigkeida ungemein.
De maischde griagad an richdiga Schock, wenn se zom airschda Mol a 
Aufnahm' vo sich selber hairad, aber dees geid sich schnell. ;-)

Em Lauf dr Zeid send so iber 60 Liader zemma komma, vo denen einige 
durchaus bemerkenswerd send ond dia mo i jedsd doilweis uf YouTube 
veröffendliche.
Deshalb hod der Chor au an griffiga Nama griagd: "Ad Libitum virtuale" 
mid am  Namenszusatz "Collegium carminibus canendis virtuale - 
Gemeinschaft, die virtuell Lieder singt".
Klingt doch duad - oder? Aber dia Liader send au guad...

Mo ka ma dia Liader aahaira?

Doo:

YouTube-Kanal:
https://www.youtube.com/@AdLibitumvirtuale-wh23

Parallel drzua uf meira Homepage:
https://www.hartter.de/chorisches/virtueller_chor/vc-youtube/

En de nägschde Daag kommad no weidre Liader drzua...

Wer Luschd hod, derf gern jederzeid midmacha!
Ond au Bekannde, Verwandte, Nochber, Neffa, Nichda...
Ihr derfad ruhig en uiram Bekanndagreis Werbung fir mein virtuella Chor 
macha. :-)

An scheena Gruass vo Messinga
Wolfgang Hartter
www.hartter.de