Re: Ist noch jemand da?

Am 11.10.25 um 11:35 schrieb Guenther Fischer:
> 
> Langsam ist es recht ruhig hier.

Anscheinend hod hald neamer äbbas Wichdigs zom saga oder zom froga...
Ma leabd hald so vor sich ane, ohne dass äbbas Bedeudends bassiert, was 
sich zum sage lohnd.

... Am Dienstag han e mid meire Frau ca. 100 Mauldascha g'macht.
Em Brinzip woss jeder, wia des gohd ohd hodd wahrscheinlich sei oigas 
Rezepd.
Wea's endressierd ka mei Dokumendadsio so aagugga:
www.hartter.de/maultaschen

Gestern hämmer Quidda endsafdad - 4 Lidder Saft, der mo heid zo Gelee 
verkochad wird.
Morga geid's au do drvo a Dokumendadsio (Link kommd no auf dr Stardseide 
vo www.hartter.de).

Ansonschden bene eifrig beim Noten schreiba od Videos erschdella.
Dui Kantorei wo i midseng führd nächgschd Johr d "Schöpfung" vom Haydn 
auf. Do drfier schreib i fir'd Sänger Übungsdateia ond mach drvo Videos 
bei denne mo de jeweilig Schdemm lauder ond dr Tegschd größer ond fedd 
ischd. Weil do au a Orcheschder drbei isch, ischd dees an Haufa Arbad.
De "normale" Sängerinna ond Sänger griagad d Übungsdateia bloß "a 
cappella" - also bloß Chornoda.
Wer en meim virtuelle Chor "Ad Libitum virtuale" midsengt, graiagd a 
Orchester-Version quasi als Belohnung fir's midsenga.

Mein virtuella Chor han e en dr Corona-Krise gründad, Aafangs war der 
bloß als Ersads fir de normale Chorproba (dia mo jo domols ed 
schdaddfende kenna händ) gedachd.
Inkzwischa send uf YouTube über 60 Videos veröffentlichd - ond werrad 
sogar aaghörd. :-)
Do ka ma d Playlischd aagugga und die Videos aahöra:
"Ad Libitum virtuale" auf YouTube: 
https://www.youtube.com/@AdLibitumvirtuale-wh23
Wer hod Luschd zom midmacha? S ka jeder midmacha, au wenn er 
vermeindlich ed so guad senga ka. Mid dr Technik ka mo so einiges regla...
I däd me über nuie Midsänger/inna freia!
Infos über "Ad Libitum virtuale" au auf www.hartter.de (s. LInk uf dr 
Schdardseite)...
Ällas wahnsinnig endressand - oder?
An scheena Gruass vo Messinge
Wolfgang Hartter