| Newsgroups |
gmane.culture.language.esperanto.britain |
| Message-ID |
<[email protected]> |
PRETIĜAS NOVA FORUMO POR UEA-MEMBROJ
Responde al la alvoko publikigita en Gazetara Komuniko n-ro 769
<https://uea.org/gk/769a1> (la 4-an de decembro 2018) krei novan retan
kunlaborejon por nia membraro, alvenis kvar kandidatiĝoj ĝis la amendita
limdato, la 18-a de februaro. Post intensaj diskutoj kaj analizoj pri la
bonegaj kvar proponoj, la Estraro decidis favore al la propono de la
brita esperantisto Tim Owen, kreinto de la nova retejo de UEA uea.facila
<https://uea.facila.org/> (vidu Gazetaran Komunikon n-ro 780
<https://uea.org/gk/780a1>) kaj kunaŭtoro de la nova lernolibro pri
Esperanto por anglalingvanoj Complete Esperanto.
Origine ni planis lanĉon de la nova forumo jam post unu monato da
laboro. Tamen intertempe Tim Owen proponis al Emiljo Cid, la estrarano
pri informado, aldoni pliajn funkciojn, elektitajn el inter la plej
utilaj kaj modernaj rimedoj nun uzataj en bonaj retejoj. Tiujn aldonajn
funkciojn li pretas prilabori volontule. UEA konsentis pri tiuj aldonaj
proponoj kaj rezulte la lanĉo de la forumo estas nun antaŭvidata por la
komenco de majo.
La nova forumo estos tute moderna. Eblos uzi ĝin egale per poŝtelefonoj
kiel per komputiloj, registriĝi kaj ensaluti per Facebook, Google kaj
Twitter, 'ŝati' kaj 'malŝati' afiŝojn, kio servas por montri per poentoj
la plej bonajn komentojn kaj afiŝintojn, kaj multe pli. Ĝi estos grava
paŝo en la ĝenerala administra modernigo de UEA, kiu restas prioritata
por la nuna Estraro.