Skandali i nje lajmi i te perditshmes “Tema”

 
_http://ina-online.net/shqiperia/8629.html_ 
(http://ina-online.net/shqiperia/8629.html) 


Skandali i një lajmi të përditshmes “Tema”
 
 
Shoqatat shqiptare dhe Tifozat Kuq e Zi në Maqedoni kanë reaguar ndaj një  
lajmi skandaloz të publikuar nga e përditshmja shqiptare ”Tema” në Tiranë.  
Reagimi është bërë si shkas i një lajmi të publikuar nga kjo gazetë, ku  
përshkruhet një situatë me tifozët shqiptarë nga Maqedonia dhe Kosovë para  
përballjes së ditës së premte të Kombëtares me Francën, me ç`rast tifozët  
shqiptarë nga Maqedonia përshkruhen si maqedonas, ndërsa ata nga Kosova si  
kosovarë në tekstin me titullin skandaloz ”tifozët kosovare zihen me ata  
maqedonas”.  
Lidhja e Arsimtarëve Shqiptarë, Shoqata e Historianëve, tifozë nga Tifozat  
Kuq e Zi si dhe disa organizata joqeveritare shqiptare kanë kërkuar që kjo  
gazetë urgjentisht të bëjë përmirësimin e gabimeve të tilla dhe njëherë e  
përgjithmonë të hiqen nga fjalori thirrjet dhe emërtimet e tilla për 
shqiptarët  që jetojnë jashtë trevave të shtetit shqiptar si Kosovë, Maqedoni dhe 
trojet  tjera.  
”Ne i bëjmë thirrje të gjitha mediave shqiptare në Tiranë të kenë kujdes 
dhe  të shmangin njëherë e përgjithmonë këto emërtime. Derisa mediat serbe në  
Beograd, Kosovën akoma e mbajnë në rubrikat e tyre që kanë të bëjnë me  
zhvillimet dhe politikat e Serbisë, mediat në Tiranë na tjetërsojnë dhe  
skandalizojnë me emërtime të turpshme dhe fyerje ndaj përkatësisë tonë  kombëtare. 
Kërkojmë urgjentisht që kjo çështje që nuk po ndodhë për herë të parë  të 
jetë një temë debati në mediat shqiptare dhe institucionet e tjera”, thuhet  
në një reagim të dërguar në adresën e agjencisë së lajmeve INA.  
Ja se çfarë ka shkruar ”Tema”  
E pabesueshme, tifozët kosovare zihen me ata  maqedonas 
Një ngjarje e pazakontë ka ndodhur gjatë pasdites së sotme, teksa tifozët  
e kombëtares janë zënë me njëri-tjetrin. Në zënkë janë përfshirë tifozët  
maqedonas të kombëtares me ata kosovarë.  
Përplasja me tifozëve ka qenë e dhunshme dhe është dashur ndërhyrja e  
policisë për të ndarë tifozët. Ende nuk dihen arsyet e sherrit mes tifozëve  
maqedonas dhe kosovarë.