Kunlaboru kun Biblioteko Butler

Por tiuj, kiuj ne scias tion, Biblioteko Butler estas la biblioteko de 
Esperanto-Asocio de Britio. De nun ni volas dialogi kun legemuloj ne nur 
en Britio, sed ja el kiu ajn lando, por plibonigi nian programon de 
libroakirado.
Ne nur pri libroj temas, kompreneble, sed ankaŭ pri kodiskoj (KD) kaj 
DVDiskoj, fakte ĉio, kio povas aparteni al biblioteka kolekto.
De kelkaj jaroj ni klopodas por rekapti kelkajn erojn kiujn ni maltrafis 
en la "ekzilaj" jaroj de nia biblioteko, kiam la asocio estis en 
provizora oficejo en Ipswich, kaj la biblioteko estis en vartenejo. Dum 
tiu tempo ni ricevis preskaŭ nenion, kaj nun ni provas forigi la 
mankojn. Dum la priaj esploroj evidentiĝis, ke ankaŭ pli frue ni 
maltrafis interesaĵojn, do nun ankaŭ tiujn ni postĉasas.
Ni nun proksimiĝas al la fino de tiu laboro; do ni estos pli liberaj por 
akcepti proponojn, sugestojn, ideojn pri eroj, kiuj devus esti en la 
biblioteko, kaj pri agadoj, kiujn la biblioteko povus utile aldoni al 
sia repertuaro. Se vi havas ion tian en la kapo, ne tenu tion nur tie, 
sed sciigu ĝin aŭ per mesaĝo en tiu ĉi forumo, aŭ per privata mesaĝo al 
la supra adreso.
Kelkaj utilaj ligoj:
Pri la biblioteko ĝenerale: <http://biblbut.wordpress.com/>
Libroj k.a. lastatempe akiritaj: 
<http://biblbut.wordpress.com/kio-estas-kie/pri-la-biblioteko/novaj-libroj/>
Libroj k.a. baldaŭ mendotaj: 
<http://biblbut.wordpress.com/kio-estas-kie/pri-la-biblioteko/ni-mendos/>
Kaj tute sube vi vidos liston, de tio, kion ni proponas ĉi-monate mendi.
Viaj komentoj, rekomendoj kaj malrekomendoj estos tre bonvenaj.

Geoffrey King

AKVON, mi petas! -     Hukuoka (JP), 1984
CHERPILLOD, André - Atlantido -     Courgenard (FR): la aŭtoro, 1997
CHERPILLOD, André -     De la edikto de Nanto ĝis la ribelo de la 
kamizardoj -     Courgenard (FR), 1999
KRUUSALU, Valev -     Estonoj tra tempoj I, II (2 vol.) -     Tallinn, 
1997/1998
MARX, Karl kaj ENGELS, Friedrich -     Manifesto de la Komunista Partio 
-     MAS, 2011
LENIN, Vladimir Iljiĉ -     Ŝtato kaj revolucio -     MAS, 2011
UNUIĜINTAJ NACIOJ -     Internacia konvencio pri rajtoj de ĉiuj migraj 
laboristoj kaj ilia familio -     MAS, 2011
CONLANG (DVD) -     Sandbox Hero, 2010
RIVIÈRE, Christian -     Vortfarado kaj radikfarado
BELETRA almanako 10 -     Mondial, 2011



------------------------------------