Ibrahim Kelmendi si Gruevski

I.Kelmendi si Gruevski

 *

http://zhurnal.mk/content/?id=126116123527


 (Reagim ndaj shkrimit “ Republika e Makedonisë-sfidë apo problem për
shqiptarët?” të autorit Ibrahim Kelmendi, të botuar me 28 maj 2012, ditë e
hënë, në Gazetën “Zhurnal plus”, Maqedoni f.10) *
*
Shkruan: Hamdi Nuhiju*

Kaloi gati një javë nga botimi i këtij shkrimi në gazetë. Asnjë reagim ndaj
këtij shkrimi nuk pata mundësi të lexoj, përveç dy tre fjalëve të thëna nga
Dr.Rufi Osmani në emisionin Rruga e Drejtë....

Si duket, shqiptarët e këtushëm jemi mësuar që ta pranojmë në heshtje çdo
tezë që përshtatet me maqedonasit, me grekët, me bullgarët, me serbet, dhe
në heshtje ti lëmë shumë gjëra. Lexuesi i vëmendshëm i historisë, ka
mundësi të lexoj shumë reagime të rilindësit tanë Sami Frashëri në gazetat
greke, për blasfemitë dhe të pavërtetat që servonin ato ndaj shqiptarëve
dhe çështjes shqiptare në përgjithësi. Edhe Asdreni në gazetat e kohës u
përballë me shumë oportunist. Faik Konica ishte njëri prej kryesuesve në
debatet e nxehta që zhvilloheshin në kohën e tij. Në Republikën e
Shqipërisë sot nuk mund të gjejmë debat të mirëfilltë pa sharje, pa fyerje,
pa etiketime. Edhe nëse e paraqet alternativën historike, ti gjithmonë nga
mediat e Shqipërisë do të censurohesh.
Në gjithë këtë rrëmujë ideologjike, politike, ekonomike dhe shoqërore, po
bën një punë të mirë Gazeta Zhurnal Plus në Maqedoni, që së paku i jep
hapësirë mendimit alternativ, duke nxitur kështu gërshetimin e ideve dhe
mendimeve dhe nxjerrjen në pah të realitetit që të gjithë ne po e
dëshirojmë.
Ibrahim Kelmendin e kam përcjell edhe më parë. Edhe pse ndoshta mund të jam
moshanik me fëmijët e tij, por skena e publicistikës nuk njeh kësi ndasi.
Gjenerata e Ibrahim Kelmendit kanë pasur fatin që të lexojnë dhe studiojnë
librat, mendimet, shkrimet e filozofit të madh Sejfedin Sulejmani. Por, ai
lihet në heshtje, është shuar, harxhuar, harruar totalisht për shkak të
qëndrimeve të tij anti-kombëtare. Në atë kohë, ishte kundër unifikimit të
gjuhës shqipe në Kongresin e Tiranës. Shkrimi i fundit i Ibrahim Kelmendit,
më duket se përshtatet fort mirë me qëndrimet, idetë dhe mendimet e
Sejfedin Sulejmanit për çështjen e unifikimit të gjuhës shqipe.

Se do të ketë ithtar Nikolla Gruevski edhe nga publicistët shqiptar, për
mos futjen e Maqedonisë në NATO, as që e kam menduar. Shqiptarët e
Maqedonisë nuk kanë alternativë tjetër përveç se futjes së Maqedonisë në
NATO, dhe BE. Çdo vonim që bëhet në këtë gjë, është torturim plus ndaj
shqiptarëve të këtushëm, etiketim, vrasje, rrahje, përndjekje politike etj.

Në nëntitullin e shkrimit të tij NATO po mban qëndrim të padrejtë  ndaj
RM_së, I.Kelmendi thekson:” Tashmë duhet të thuhet e vërteta se NATO, për
shkak të përcaktimit bazik konsensual në rastin e vendimmarrjes për
pranimin e shteteve të reja në Aleancë, po mban qëndrim krejtësisht të
padrejtë ndaj RM-së, vetëm për shkak të kushtëzimit helen me ndryshim të
emrit.”

Në fakt, Maqedonia po mban qëndrim të padrejtë ndaj NATO-së. Në një TV
maqedonase, ish kryetari i R.M. Branko Cërvenkovski, paraqiti një dokument
me vulën sekret shtetëror, ku thuhet qartas në atë dokument se Maqedonia në
vitet 2005-2006 ka qenë në prag të zgjidhjes së kontestit të emrit me
Greqinë. Marrëveshja ka qenë e tillë që me shkronja cirilike të pranohet
Republika e Maqedonisë për tre vjet, dhe pas tre viteve të njihet si
Republic of Macedonia. E dimë fort mirë se Maqedonia nuk e kishte këtë
flamur, por e ndryshoi me presion ndërkombëtar. Pastaj, flamuri i Kosovës
nuk është etnik, por territorial, e as ai i Bosnjës dhe Hercegovinës. Vet
Ibrahim Kelmendi e di se këto janë standarde ndërkombëtare që përdoren për
të gjitha shtetet pa përjashtim, jo vetëm për Republikën e Maqedonisë.

Kontesti i emrit me Greqinë, nuk është për përdorimin e gjithëmbarshëm.
Greqia e pengon Maqedoninë që të futet në organizatat ndërkombëtare me
Republika e Maqedonisë, dhe përkohësisht e kanë zgjedhur emrin IRJM. Ndërsa
në përdorim të brendshëm, po edhe me shtetet që e njohin Maqedoninë me
emrin e saj kushtetues, Maqedonia do të përdor emrin e saj kushtetues.

Ibrahim Kelmendi vazhdon më tej:” Po ta zëmë së maqedonasit do të pranonin
të ndryshonin emrin, gjegjësisht identitetin etnik, sipas kushtëzimit
helen,”
Askush deri tash nuk ka folur për ndryshimin e identitetit etnik të
maqedonasve, përveç garniturës së Nikolla Gruevskit, Ibrahim Kelmendit dhe
disa gazetave ekstreme greke. Kosova është shtet dhe askush nuk po fol e as
që po i kushtëzon banorët e saj të shprehen me një identitet tjetër. Bosnja
dhe Hercegovina është shtet shumetnik, dhe po ashtu askush nuk po kërkon
nga ato që ta ndërrojnë etnitetin e tyre. As ndaj Maqedonisë nuk po
kërkohet kjo gjë, asnjëherë nuk është kërkuar dhe as që do të kërkohet.
Maqedonasit ngelin maqedonas, dhe nëse duan ata të quhen ndryshe, le të
quhen, askush nuk i pengon.
Ndërsa në nëntitullin tjetër Përparësitë e anëtarësimit në NATO, I.Kelmendi
me zell flet për mangësitë dhe të zezat e anëtarësimit në NATO.
NATO, shtetet e veta anëtare i mbron nga sulmet e jashtme dhe jo ato të
brendshme. Kësi mendimi ka edhe Vllatko Gjorgjev i VRMO-DPMNE, duke aluduar
në atë se rreziku i Maqedonisë është i brendshëm dhe jo i jashtëm. Aludimi
shkon tek shqiptarët e këtushëm se janë rrezik ekzistencial për Maqedoninë.
Prandaj edhe nuk ka nevojë për anëtarësimin e Maqedonisë në NATO.

Përmendet shtrydhja që i bën popullatës së këtushme EVN-Maqedoni, një
investitor austriak. Por, I.Kelmendi, harron të përmend se me integrimin e
Maqedonisë në NATO, shtrydhje të këtilla nuk do të ekzistonin pasi që
EVN-Maqedoni, nuk do të kishte nevojë të mbulojë shpenzimet e VRMO-DPMNE
gjatë fushatave zgjedhore, e as të korruptoj një garniturë të tërë
politike. Investimet janë trefishuar me futjen e Shqipërisë në NATO, dhe
nuk janë ulur.
Në agjendën e NATO-s në Irak, Afganistan, e gjetiu, sipas I.Kelmendit
shteteve do tu shtoheshin kosto financiare për pjesëmarrje.
Ai harron, se secili shtet që merr pjesë në rreziqe të këtilla, ai merr
edhe nga kulaçi i ndarë. Lexuesit e diplomacisë e dinë fortë mirë këtë gjë
që po e them.
Ky shkrim me ato politikat e VMRO-DPMNE askund nuk bie në kundërshtim.

Si qytetar i thjeshtë i Maqedonisë, po përmendi edhe disa gjëra  se çka
ndodh me mos pranimin e Maqedonisë në NATO:
1) Faji hedhet tek shqiptarët. Sepse ne po e destabilizojmë Maqedoninë, pa
ia duam të keqen, po i vrasim, po ia marrim bukën.

2) Shqiptarët ngelen pa punë, pa ekzistencë, pa bukë, sepse investitorët e
huaj nuk futen në një shtet të pasigurt.

3) Si rezultat i këtyre politikave, shqiptarët do të detyrohen të
shpërngulen për në BE, dhe kështu Maqedonia të zbrazet nga shqiptaret.

4) Korrupsioni i secilës qeveri në vend, rritet, partitë shndërrohen në
ente punësimi, dhe njeriu shqiptar zhvlerësohet totalisht duke humbur
dinjitetin, krenarinë etj.

5) Shqiptarët nuk do të janë në gjendje as në komunat e tyre ti emërtojnë
shkollat shqipe me emra patriotësh shqiptar.

6) As emrat e rrugëve të banuara kryesisht me shqiptar nuk do të kemi
mundësi që ti ndryshojmë pa mos kërkuar ‘leje’ prej maqedonasve.

7) Nëse një maqedonas për një punë të c`rregullt të caktuar nga qeveria,
paguhet 30.000 denarë, për të njëjtën punë një shqiptar do të merrte 9200
denarë.

8) Maqedonasve, shteti ua ndan tokën për tu varrosur dhe ua mbulon
shpenzimet e rregullimeve të varrezave, shqiptarët duhet që të paguajnë për
të blerë tokë për tu varrosur, ti mbulojnë vet shpenzimet e varrimit, plus
pa asnjë arsye Ndërmarrjes Publike për Higjienë dhe Gjelbërim do të
detyrohet t`i paguaj 2000 denarë.

Nëse Sejfedin Sulejmani u harrua nga popullata e këtushme për shkak të
qëndrimeve të tij anti-kombëtare që përshtateshin me politikat e sllavëve
kundër shqiptarëve, këtë trend të harresës do ta përjetojmë të gjithë ne,
po qe se, mbrojmë politikat e padrejta të sllavëve të Maqedonisë e të
Ballkanit.