[AlbClub] Prag lufte, prandaj ky kryeministër ?!

                  *** AlbClub Discussion List ***





Prag lufte, prandaj ky kryeministër?!
[Gazeta Shqiptare, 25.5.2008]

Shtimi edhe i "heqjes së imunitetit", në ndryshimet e Kushtetutës, është një 
"colpo di grazia" (goditje për të vdekur me siguri...), që po përgatitet për 
jetën politike demokratike shqiptare.  Shqipëria po bëhet një shtet me 
kufizime drastike të lirisë dhe demokracisë, që shkojnë kundra principeve 
bazë të ndërtimit të shtetit modern.  Ne i njohim mirë mendësitë dhe 
praktikat e promotorit shqiptar të këtyre ndryshimeve, kryeministrit aktual 
Sali Berisha-ato i njohin edhe miqtë e huaj të Shqipërisë.  Ajo që na ka 
çuditur, ajo që nuk po arrijmë ta shpjegojmë, ta kuptojmë, është paradoksi i 
qëndrimit të shumë miqve të huaj të Shqipërisë.  Ata në kor po i mbështesin 
këto ndryshime, madje edhe po shtyjnë me shumë insistim për kryerjen e tyre. 
Merakosemi se mos jemi para ndonjë rreziku që ne nuk e dimë, e që miqtë tanë 
të huaj kanë informacion-këtë gjejmë si të vetmin justifikim të këtij 
paradoksi.

I vetmi problem real dhe urgjent që kishte vendi ynë me Kushtetutën e tij, 
ishte zhdukja e megadushkut: vjedhja e deputetëve nga njëra parti, njëri 
kryetar, me mashtrim zgjedhor.  Zgjidhja e problemit ishte shumë e thjeshtë: 
në sistemin ekzistues zgjedhor, në atë me të cilin u votua në vitin 2005, të 
bëhej vetëm një ndryshim: zgjedhësi të kishte vetëm një votë, të përbashkët, 
për partinë dhe kandidatin.  Por nuk u bë kjo, por u bë transformimi tërësor 
i Kushtetutës.


* * *

Ndryshimet e kushtetutës janë bërë me llogaritje për t'i shtuar pa masë 
pushtetin një njeriu të vetëm: kryeministrit/kryetarit të partisë së 
shumicës.  Rritja e pushtetit të tij po bëhet jo në mënyrë të natyrshme, jo 
si rezultat i ndryshimit për mirë të mendësive të shqiptarëve, por po bëhet 
me ngut, me dhunë dhe me mashtrim-e kush po e miraton pa, deputetët e 
megadushkut, ai produkt i mashtrimit.

E gjitha po realizohet në dëm të Lirisë dhe Demokracisë, në dëm të 
institucioneve të tjera të shtetit: i janë nënshtruar një personi, 
kryeministrit, të gjitha pushtetet e vendit: legjislativi, gjyqësori dhe 
ekzekutivi.

Me heqjen e imunitetit, ndryshim ky që pritet të bëhet, plotësohet dhënia e 
fuqive të jashtëzakonshme kryeministrit: ai do të ketë në dorë jo vetëm 
institucionet veç e veç, por edhe çdo punonjës të tyre veç e veç.  Kjo sepse 
Kushtetuta "e re" e përfunduar, do t'ia lehtësojë mbylljen e gojës së çdo 
zyrtari veç e veç, konkretisht të çdo deputeti veç e veç, duke i mbajtur mbi 
kokë shpatën e sistemit të degjeneruar të drejtësisë shqiptare.  Çdo 
kryeministër shqiptar deri sot, e ka pasur në xhep sistemin e drejtësisë, e 
aq më tepër do ta ketë, kur t'u hiqet imuniteti edhe punonjësve të lartë të 
drejtësisë.

Të tilla kufizime të lirisë dhe të demokracisë, kemi parë të bëhen, në 
vendet jodiktatoriale, vetëm në raste gjendjeje të jashtëzakonshme (si luftë 
etj.).  Nuk kemi parë asnjë kushtetutë demokratike, që në kushtet normale të 
jetë e tillë, si e bënë këtë tonën.  Madje, edhe sikur këto ndryshime të 
kaloheshin në kapitullin "Masa të Jashtëzakonshme" (nenet 170-175 të 
Kushtetutës sonë), prapë nuk do të ishim të qetë, sepse do të na dukeshin 
pak si shumë, edhe për gjendjen e jashtëzakonshme.


* * *

Kryeministri ynë, aktuali apo dhe çdo tjetër pas tij, sipas kushtetutës së 
"re", na duket se po bëhet si një Hitler apo si një Stalin.  E pra, miqtë 
tanë perëndimorë i njohin mirë rreziqet që i sjell një i tillë, çdo vendi, 
edhe një vendi të vogël si yni.

Ata, miqtë tanë perëndimorë, njohin mirë edhe promotorin e këtyre 
ndryshimeve, z. Berisha, atë që sot është kryeministër, e që ishte dje 
kryetari i plotfuqishëm i shtetit (presidenti), kur e rrënoi Shqipërinë 
tërësisht në vitin 1997, kur na çoi "12 vjet" mbrapa me pranimin në NATO e 
në BE, kur edhe jetën na e shpëtuan po miqtë tanë perëndimorë.  Po si ka 
mundësi që nuk e kundërshtojnë z. Berisha, kur ai deklaron publikisht; 
"perëndimi më beson"?!  A mos do të besohej edhe Enver Hoxha po të ngjallej, 
dhe të fuste në stafin e vet çdo lloj arrivisti që do të gjente rrugës, nga 
ata që i ngjiten çdo lloj pushteti?!

Shumë miq tanë perëndimorë kanë përkrahur të gjitha ndryshimet kushtetuese 
të kryeministrit tonë, si dhe të udhëheqësit të opozitës z. Edi Rama.  Madje 
po këmbëngulin me të madhe që të bëhet edhe "heqja e imunitetit".

Fillimisht kujtuam se e gjithë kjo është një lajthitje personale e një 
ambasadori.  Por jo, po këmbëngulin të gjithë-në fakt, akoma nuk kemi 
dëgjuar konstitucionalistë, apo ekspertë të shkencave politike, por mbase 
dhe ata do të ndjehen.  E këtu me "të gjithë", nënkuptojmë miqtë e huaj 
politikanë mjaft të lartë, tregtarë e biznesmenë, kryetarë fondacionesh 
ndihmash, deri dhe turistë të zakonshëm.  Të gjithë këta po e ndjejnë "për 
detyrë" të na këshillojnë për ndryshimet, "të heqim imunitetin" e të tjera 
si këto, krejt jashtë kontekstit të momentit që i sjell në kontakt me 
Shqipërinë,
Jemi si të trullosur: nuk po kuptojmë se ç'po ngjet!

Mundohemi të sqarojmë dhe të shpjegojmë kontradiktat që lindin në mes kësaj 
përkrahjeje të ndryshimeve të Kushtetutës "nga të gjithë perëndimorët", dhe 
principeve të ndërtimit të një shteti të lirë dhe demokratik.

Me "principe të ndërtimit të një shteti", e kemi fjalën për ato principe që 
janë promovuar me zjarr, gjatë gjithë tranzicionit, por edhe para tij, nga 
të gjithë miqtë tanë të huaj, nga po ato vende mike perëndimore.  Këto 
principe janë promovuar që me shprehjen e paharrueshme si "Freedom works" 
("Liria i rregullon gjërat automatikisht"), e thënë nga sekretari i shtetit 
(SHBA) Xhejms Bejker (James Baker) gjatë vizitës së tij në Tiranë, më 
22.6.1991; e deri tek shprehja "imuniteti parlamentar nuk është privilegj i 
deputetëve", e thënë nga ekspertët e Komisionit të Venecias më datë 
20.3.2006 (italiani Sergio Bartole dhe gjermani Ceorg Nolte); këto sa për të 
përmendur dy thënie në data ekstreme të një periudhe 17 vjeçare.

I vetmi shpjegim që arrijmë të gjejmë logjikisht për këtë paradoks, është sa 
vijon: duhet të ketë një rrezik imediat që na kanoset ne këtu në Shqipëri. 
Këtë rrezik ne nuk e dimë konkretisht cili është, por miqtë tanë të huaj, 
duket se e dinë, dhe prandaj miratojnë, këshillojnë dhe këmbëngulin në këto 
kufizime të Lirisë dhe Demokracisë.

Gjithsesi, rruga më e drejtë do të ishte të shpjegohej publikisht ky rrezik, 
edhe nga miqtë tanë të huaj-fundja të mos jepen detaje, por ama të flitet së 
paku në përgjithësi.

Mosshpjegimi i situatës reale, krijon çoroditje qoftë doktrinare, qoftë dhe 
zhgënjim, ku ksenofobia, e shprehur si "anti-amerikanizëm" (si ai që futi 
presidenti i vendit Berisha, në vitin 1996-97), apo si "anti-evropianizëm", 
është rreziku më i madh.  Këto janë rreziqe, për kombin tonë, që asnjë 
shqiptar patriot nuk i dëshiron.

Me një shpjegim të rrezikut, me një shpjegim qartë e pa ngutje të tij, do t'i 
kurseheshin shoqërisë sonë shumë përpjekje, ankthe dhe energji mendore e 
shpirtërore, që ka kohë që po bëhen me bindjen e plotë se po i kundërvihemi 
një të keqeje të madhe.


Bashkim Kopliku
25.5.2008


Phone: +355 52 223663
Mob: +355 0682200590
Email: <[email protected]>
optional: <[email protected]>

Please, send important e-mails
on both addresses.



__________ Information from ESET NOD32 Antivirus, version of virus signature 
database 3137 (20080527) __________

The message was checked by ESET NOD32 Antivirus.

http://www.eset.com 

______________________________________________________________
If you wish to unsubscribe, send a blank message to:
[email protected] , or visit Alb-Club's page at:
http://www.alb-net.com/mailman/listinfo/alb-club