[AlbClub] Fwd: Per Ben dhe fenomenin e minjve te gjirizit te internetit

                  *** AlbClub Discussion List ***

E nderuara Bogdani

Analiza juaj për sa i përket dëshirës për t'u shprehur anonimisht në  
alb-club është e gabuar, tendencioze dhe fyese. Anonimitet nuk është i  
lidhur detyrimisht me dëshirën për t'u fshehur përgjatë një  
komunikimi, por shpreh dëshirën pragmatike për ta përqendruar  
diskutimin thjeshtë në përmbajtjen e tij. Në kulturën e diskutimit  
shqip është pothuajse e pamundur të diskutohen vetëm mendimet, pasi  
herët apo vonë, kryesisht kur përfundojnë argumentet, diskutimi  
vazhdon në formën: "ne e dimë se pse flet e shkruan ti kështu; ngaqë  
të paguan ky apo ai". Në këto rrethana nëse ti je e interesuar në këtë  
forum të shkëmbesh mendimet e tua (dhe vetëm ato) do të të duhej që ta  
pranosh anonimitetin si një nga elementët e zakonshëm të kulturës së  
komunikimit.

Ti Bogdani fyen kur presupozon se shkaku i anonimitetit është dëshira  
e " ca pinjollë te ish nomenklaturës komuniste" të detyruar nga halli  
për të vepruar kështu, pasi presupozon një faj të shkruesit të cilin e  
lidh detyrimisht me origjinën familiare dhe jo me aktivitetin  
intelektual të individit dhe kjo Bogdani është një mendësi orientale  
dhe enveriste dhe e shkreta ti që e paske.

Ti Bogdani bën një ndarje në anonimë pozitivë dhe anonimë negativë  
duke ju referuar relevancës letrare të përzgjedhjes së pseudonimeve, e  
cila do të duhej të ishte komplet irelevante për sa i përket thelbit  
të një diskutimi. Fakti që Halle Qamilja ty t'u paska hapur, do të  
thotë se të paktën për ty ky anonim nuk qënka më si i tillë dhe se të  
radhiturit të shkrimeve të këtij personazhi kaq simpatik në radhën e  
anonimeve, do të ishte një gabim substancial. Për sa i përket  
përdorimit të pseudonimeve apo anonimeve do të duhej që këtë të  
ndaheshin nga njëra - tjetra (që një dreq e di se pse do të duhej bërë  
edhe kjo, por meqë po ngul këmbë për të disatën herë). Pseudonimet  
shpesh janë personazhe jo-realë, artistikë, janë maska, janë figura  
shumë të këndshme, të cilat nuk shprehin shpesh vetëm mendimin e tyre  
por një mendim të përmbledhur. Anonimet janë persona realë, të cilët  
janë thjeshtë këtu për çdo gjë tjetër, por në asnjë mënyrë për të bërë  
krushqi me ty, kështu që biografitë e tyre private apo intelektuale  
apo shkencore nuk i shpërdorojnë duke i afishuar ku të munden nëpër  
faqet e internetit, por pikërisht vetëm aty ku atyre vetë apo të  
tjerëve u hynë në punë.

Për sa i përket fyerjeve në internet apo konkretisht në alb-club ato  
padyshim që janë akte rrugaçërie, të cilat meritojnë moderimin dhe  
nxjerrjen jashtë nga lista, pasi në planin personal fyejnë  
bashkëbiseduesin dhe në planin e përgjithshëm prishin diskutimin. Nëse  
do të të hynte në punë për të ruajtur higjienën komunikatave  
intelektuale mbaj parasysh të lutem se dinjiteti i njeriut, të cilin  
shumica në këtë klub e respektojnë me një predispozicion pozitiv nuk  
është një kategori e rezervuar vetëm për jo-anonimët, por edhe për  
anonimet. Në këto rrethana të akuzosh për lidhje më një regjim  
diktatorial një anonim pa patur (ose të paktën pa përmendur) asnjë  
provë për këtë është një fyerje po aq e rëndë prej rrugaçi, sa do të  
ishte pohimi p.sh. që "MB është komplet Bibë".

Për sa i përket biografive personale dhe analizimit të tyre kjo është  
diçka që kryesisht i lihet në dorë fillimisht të prekurve nga ky  
proces. Nëse dikush ekspozohet në jetën publike si një komponent i  
saj, pra si një politikan, ky person duhet të marrë në konsideratë dhe  
të pranojë si të mirëqenë nevojën e komunikuesve të tjerë me të për  
t'i analizuar biografitë personale. Si rregull politikanët kanë një  
lëkurë të trashë dhe e marrin në konsideratë një gjë të tillë si një  
dukuri normale. Madje ka të tillë që edhe koketojnë pak me këto  
rrethana e u pëlqen kur dikush ua merr nëpër goja jetën e tyre, sepse  
kjo i bën të besojnë se janë ende në fokusin e vëzhgimit publik. Në  
rastin e të vdekshmeve të zakonshëm (si rasti yt) biografia është  
shpalosur me dëshirën tënde në këtë forum shumë më herët se sa ti të  
kishe shpalosur mendimin tënd, pra shumë më herët që lexuesit disa  
vjeçare të këtij forumi të kishin krijuar një mendim të tyre për penën  
Bogdani, ju afishua një biografi shumë e hollësishme nga ty vetë. Kjo  
gjë nuk është shumë e zakonshme në këtë forum, bashkëkomunikuesit i  
shkëmbejnë mendimet verbalisht dhe jo duke krahasuar diplomat. Ti e  
bëre se ashtu t'u duk më mirë. Është zgjidhje e jotja, askush nuk ta  
detyroi, pra mos u çudit kur ndokush që ka nge rri dhe të analizon.  
Megjithatë kush do të ishte i mençur do të duhej që ta mbishikonte  
dëshirën tënde për t'i treguar çdokujt, se çfarë ke arritur në jetë,  
pasi siç është përsëritur me mijëra herë në alb-club e rëndësishme  
është se ç'thua këtu.

Kështu Bogdani, lëri rehat anonimet me analizën e predispozicionit të  
tyre për të shkruar se nuk të pyeti njeri e shiko punën tënde - në  
kuptimin që thuaj atë që di e do pa u marrë me të tjerët se as ty nuk  
ta kush këtë për borxh.

Hajt shnet

GH


Anfang der weitergeleiteten E-Mail:

> Gjate nje debati se fundmi me nje nga anonimatet e Alb-Clubit kam  
> shprehur ndjesine time te diskomfortit (ndjesi qe me shkon deri ne  
> idiosinkrazi) kur jam e detyruar te komunikoj apo debatoj me kete  
> grup subjektesh qe kjo liste i ka me shumice. Tani une e kuptoj qe  
> anonimatet jane te detyruar me shume nga halli te paraqiten si te  
> tille (si psh ca pinjolle te ish nomenklatures komuniste, per aresye  
> qe merren me mend), se sa nga qejfi, dmth si pseudonime/personazhe  
> letrare (sic psh Simbad Detari, Halle Qomilja, apo Pseudonim  
> Ngahalli - karaktere keto shume simpatike qe ndryshe nga te paret  
> dalin njekohesisht me identititetin e tyre te vertete). Megjithate,  
> persa kohe qe anonimatet merren me diskutimin dhe debatimin e  
> argumentave ne fjale une edhe mund t'i kaperdij, po kur sulmojne e  
> ofendojne ne njerez qe paraqiten me identitetin e tyre te vertete  
> ketu une kam nje problem te madh. Keshtu dhe puna ketij Ben me msg e  
> tij te meposhtem. Une s'kam ndonje problem persa kohe ai shpreh ate  
> mendimin e tij te lire e te mosvarur mbi disidencen Kadareiane. Por  
> kur ky personazh merr ne menyre te pacipe guximin te gjykoje CV-ne e  
> Koplikut e timen pasi i ka studiuar e bere radioskopine, nderkohe qe  
> vete paraqitet vec me nje emer gjysma-gjel, qe s'i dime as  
> identitetin, le me CV-ra, kjo eshte pak te thuash e pacipe, e  
> pamoralshme dhe mistrecllek. Keto minj gjirizesh, keto burracake e  
> skutha, qe fshihen pas pseudonimeve e emrave te rreme dhe leshojne  
> shigjeta sulmi e te bejne dhe moralistin, eshte teper, teper e paket  
> te thuash qe te peshtjellojne zorret (nje shprehje "popullore  
> frazeologjike" si thoshte zysha ime e dashur e letersise, shprehje e  
> cila kete personazhin Ben na e indinjoi duke e quajtur "shprehje  
> banale", nderkohe qe nuk ju duk aspak banale shprehja e perdorur nga  
> miku i tij Dashi ne nje nga msg te tij gjate ketij debati "krijimet  
> e te cileve ambasada shqiptare e Parisit i shprendante falas, po si  
> ndodhi qe askush nuk e cau b... per to).
>

______________________________________________________________
If you wish to unsubscribe, send a blank message to:
[email protected] , or visit Alb-Club's page at:
http://www.alb-net.com/mailman/listinfo/alb-club