[AlbClub] Robërimi i ri i fshatarit

                  *** AlbClub Discussion List ***



Robërimi i ri i fshatarit
[Gazeta Shqiptare, 11.9.2007]

Po dëgjojmë se shteti do t'u sekuestrojë tokën pronarëve, sepse nuk e 
punuakan siç i pëlqen kryeministrit; pastaj zbutet, dhe thuhet se do t'u 
vërë taksa më të larta atyre që e punojnë më pak tokën, dhe më të ulëta, 
atyre që e punojnë më shumë tokën.  E pastaj seç flitet për disa rimbursime 
pjesore tatimesh për fshatarët, jo "6%", e jo aq e kaq për qind, kur 
fshatarët deri tani nuk kanë paguar fare tatime!  Nuk merr vesh njeri se ç'po 
bëhet.  Por një gjë është e sigurt: shteti po përgatitet t'i përzihet 
fshatarit në punët e tija, ose me premtime proteksioniste, ose me kërcënime 
sekuestrimesh e detyrimesh të bëjë punë "angari", ose dhe ngatërresa të 
tjera, që veçse synojnë ta robërojnë prapë fshatarin, si në komunizëm.  Kjo 
po bëhet duke kaluar në etatizëm, në përzierjen me tepri të shtetit në 
vendimet individuale te fshatarit.  Duke njohur mirë raste të ngjashme, kemi 
shumë frikë se qëllimi përfundimtar është robërimi i fshatarit, për t'i 
marrë votën.


dëm ekonomik

Fshati do të dëmtohet ekonomikisht.  Mundohemi të gjejmë ndonjë material 
racional, qoftë me shkrim, apo fundja dhe me zë, por nuk ka burrë të gjejë 
gjë, në këtë qeverisje rrëmujë dhe të mbyllur, prandaj dhe nuk mund të bëjmë 
llogaritje me shifra.  Nejse, një gjë mund ta themi me siguri: etatizmi në 
bujqësi, qoftë dhe me shprehjen e tij populiste, të proteksionizmit, do të 
sillte ekonomikisht dëme të mëdha.  Dëmet e këtyre doktrinave, janë shumë 
fish më të mëdha, në vendet ku ka nëpunës shtetërorë të korruptuar, dhe të 
paaftë, siç është rasti i vendit tonë.  Ne kemi një eksperiencë të gjatë 
dështimesh, sa herë është tentuar të hyhet në skema proteksionizmi, që me 
subvencionimet për farërat; për mbjellje të kësaj apo asaj bime; të 
traktorëve të subvencionuar; të ndërtimit me para "japoneze" apo të huaja, 
"të serave"; e deri tek shitja e karburantit me çmim të subvencionuar.

Dikush po flet prapë për subvencionin e bizneseve vetëm "në fëmijërinë e 
tyre" (infant industry protection), sa të nisin, se pastaj subvencioni do t'u 
heqka sepse biznesi do të vazhduaka me këmbët e veta.  Por kjo është provuar 
sa e sa herë tek ne, dhe ka rezultuar, në shumicën e rasteve, se pas 
ndërprerjes së subvencionit, është ndërprerë menjëherë dhe aktiviteti që 
duhet të kishte kaluar me sukses "fëmijërinë e tij": fëmija i subvencionit 
shqiptar ka vdekur, sapo është shkëputet nga reanimacioni proteksionist-kjo 
është provë se gjithë paratë e subvencionit kanë shkuar kot.


Paratë po shpenzohen pa eficencë

Është e sigurt se subvencionimi i fshatarëve të veçantë, qoftë për veprime 
të tyre sipas udhëzimeve të pushtetarëve, qoftë edhe konkretisht "për mos 
lënien djerrë të tokës" (subvencionim për punimin e saj), është joeficient 
për sa i përket harxhimit të parave të buxhetit, pra të parave tona, "të 
popullit".

Do të ishte shumë më mirë që këto para, të shkonin po në ndihmë të fshatit, 
por drejtë grupimeve, drejtë bashkësive e "jo tek persona të veçantë", pra 
jo të përfundojnë në xhepat e fshatarëve me emra konkretë.  Paratë duhet të 
jepen për një rreth apo për një krahinë, apo për një grup fshatrash, apo 
fundja edhe për një fshat.  Konkretisht, ato "100 milionë euro të vitit 
 2007" që përmendin qeveritarët se po shpenzohen për subvencionime, për 
fshatarë të përzgjedhur, sipas listave me emra e mbiemra, mos të shpenzohen 
për ta individ për individ, por të shpenzohen për investime të përgjithshme. 
Këto investime të përgjithshme, mund të jenë ndërtimi e riparimi i rrugëve 
që lidhin fshatrat me qytetin, apo me qendrat ku mund të shiten prodhimet e 
tyre, apo dhe shtëpitë dhe arat e fshatarëve mes tyre; apo, edhe të 
shpenzohen për sistemimin apo ndërtimin e impianteve ujitëse apo kulluese. 
Fundja të shpenzohen edhe për të subvencionuar ndërtimin e ujësjellësve e 
kanalizimeve, për të luftuar sëmundje që prekin zona të tëra, apo dhe 
insektet që prishin bimët në një zonë të madhe, si sulmi i karkalecave etj. 
etj.


Korrupsion

Nëse paratë do t'u shpërndahen fshatarëve individ për individ, në rastin më 
të mirë, do të përfundonte një pjesë e mirë e tyre, në xhepat e rrjetit të 
nëpunësve shtetërorë që caktojnë (përzgjedhin) se cili fshatar e merr 
"subvencionimin" dhe cili jo.  Këta nëpunës, menjëherë do të vendosnin 
ryshfetin e tyre, të cilin duhet ta paguajë fshatari që të mund të marrë 
paratë e subvencionit.  Shpresa se "me vendosjen e kritereve", zgjidhet 
problemi që paratë të shkojnë direkt tek ai që i plotëson kriteret, është 
naivitet, ose hipokrizi.

Shteti në fshat, duhet të përqendrohet individualisht, vetëm tek ata 
individë që nuk mbijetojnë dot pa ndihmën sociale (pa asistencën)-e këtë të 
përpiqet ta bëjë mirë, se ka edhe këtu, me mijëra raste abuzimi, qoftë për 
marrje ndihme të pamerituar, qoftë për mosdhënien e saj atij që e ka të 
nevojshme.  Me të tjerat individ për individ, duhet të merret automatikisht 
tregu i lirë, konkurrenca.


Shtypje politike

Korrupsioni kryesor, shtypja, robërim, që fshihen pas gjithë kësaj loje me 
fshatin, është ai politik.  Kryeministri duket se ka projektuar një blerje 
të re masive të votës, apo një rrëmbim me dhunë të saj-dikush thotë se kjo 
është si reaksion i "fushatës drejt fshatit" që po ndërmerr z. Rama, 
kryetari i opozitës.  Mbase!  E rëndësishme është se po tentohet që fshatit 
t'i merret liria që kishte fituar këto 16 vjet, liria nga detyrimi që për 
çdo gjë t'i shtrinte dorën sundimtarëve politikë në fuqi.

Fshatari mori tokën, dhe u bë pronar individual i lirë, u ribë me blegtori, 
frutikulturë etj.  Ai tani mund ta shesë, ta blejë, ta dhurojë, ta punojë, 
mos ta punojë tokën e tij, sipas leverdisë së tij, pa ndërhyrjen e 
politikanëve.  Fshatari shpëtoi nga kooperativa, nga tufëzimi i detyruar, 
nga organizata e partisë komuniste, nga sigurimi, nga shteti, duke filluar 
në vitin 1991, me ligjet për tokën (ligji 7501 etj.).

Tani kryeministri aktual do ta robërojë përsëri, ta kthejë prapë në një 
vasal të partisë në fuqi, siç ishte në komunizëm.  Nuk e kemi fjalën që 
fshatari të mos paguajë tatime-mbase ka ardhur koha që ai të paguajë tatime 
si çdo biznes tjetër-por detyrimet e tij ndaj shtetit, por edhe ndihma që 
shteti i jep atij, duhet të mos varen nga fakti se e ka emrin Sytki, Sotir, 
apo Sandër, është me PD-në apo PS-në, apo me asnjërën.  Bile tatimet duhet 
të jenë ose sipas pronës që ka (sa më e madhe toka, aq më i madh tatimi), 
ose edhe sipas prodhimit (sa më i madh prodhimi, apo fitimi, aq më i madh 
tatimi), dhe jo e kundërta!

Por tatimet, në rastin e kryeministrit aktual, janë thjeshtë një armë për të 
siguruar kolltukun e vet, e nuk përdoren për qëllimin që kanë ato në Botën 
demokratike dhe të lirë.  Ajo që po përpiqet të bëjë kryeministri aktual, 
është një formë e re e robërimit të fshatarit, duke e joshur me llafe, duke 
i thënë po të fal "6%", kur atij do t'i marrësh, sepse deri dje nuk paguante 
gjë fare.  Apo duke i thënë, "po të jap ty kaq, e atij tjetrit aq, apo fare", 
duke u futur në skema gjoja proteksioniste, por që nuk janë gjë tjetër veçse 
përdorim (keqpërdorim) i parave të buxhetit, për të blerë votat e 
fshatarëve, ose për t'i detyruar të votojnë për "për qeverinë", se 
përndryshe u pritet "vërshimi i parave", apo dhe ju sekuestrohet prona 
(toka).

Procesi i robërimit të fshatit, është në princip po ai që ka nisur me 
klientelizmin në qytete, në bizneset anë e mbanë Shqipërisë.  Mos kujtoni se 
nuk na vjen radha secilit prej nesh, pavarësisht se nuk jemi fshatarë apo 
biznesmenë-kujdes!
Bashkim Kopliku
6.9.2007