[AlbClub] Bumerangu i vetëheqjes së imuniteti t

                  *** AlbClub Discussion List ***




Bumerangu i vetëheqjes së imunitetit
[Gazeta Shqiptare, 19.9.2007]

"T'ia heqë vetes imunitetin, ministri Basha", është kërkesa që po dëgjojmë 
nga shumë politikanë të opozitës.  Kjo kërkesë paraqitet si domosdoshmëri që 
drejtësia të mund të kryejë detyrat e veta në lidhje me akuzat publike për 
korrupsionin me "rrugën e Kosovës".  Por, edhe në qoftë se kjo kërkesë po 
bëhet me qëllim të mirë, kjo "vetëheqja e imunitetit" është një bumerang që 
godet vendin nga niset: qëllimin e mirë me gjithë personat bartës të këtij 
qëllimi; ai godet bazat e demokracisë, si pavarësia e personit me imunitet 
(qoftë ministër, deputet etj.), zbatimi i ligjit nga nëpunësit e shtetit 
etj.  Politika jonë duhet të kërkojë zgjidhje pa prekur principet e 
mirëfunksionimit të demokracisë, sepse në të kundërt, i hap rrugën dëmeve 
shumë më të rënda sesa vjedhja e disa miliona eurove që po përfliten për 
Rrugën: rrezikohet kapja e shtetit nga diktatorët.  Na merakos kjo kërkesë e 
"vetëheqjes së imunitetit", edhe sepse na tingëllon si pretekst për diçka 
tjetër, që nuk lidhet me Rrugën, sepse në rastin konkret, heqja e imunitetit 
nuk është as domosdoshmëri: Prokuroria mund t'i përfundojë hetimet për 
akuzat e bëra, dhe Gjykata mund të japë vendimin e saj, për shumë nëpunës të 
shtetit që duket se kanë shkelur ligjet, qofshin vetëm ata pa imunitet. 
Gjithsesi, ndërtimi i Rrugës nuk duhet të ngadalësohet për asnjë çast, 
pavarësisht pisllëqeve të mundshme dhe të zakonshme të zyrtarëve aktualë: 
rruga duhet përfunduar sa më parë.


Imuniteti

Nuk duhet kërkuar që një ministër (qoftë dhe çdo funksionar tjetër, xhanëm) 
t'i heqë vetes imunitetin, sa herë ngrihen akuza për të.  Po të ishte 
kështu, mjafton t'i sajosh një zhurmë mediatike, dhe e zhveshke nga 
imuniteti çdo person.

Po ta mendosh më gjatë, del se për imunitetin e zyrtarëve të shtetit, kemi 
më shumë nevojë ne, populli, sesa vetë ata.  Duke pasur zyrtarë me imunitet, 
pra të mbrojtur nga ligji, kemi më shumë garanci se ata do t'i kryejnë më 
mirë detyrat e tyre për ne, "për popullin", po deshëm të përdorim shprehje 
patetike.  Një zyrtar i lartë pa imunitet (ministër, deputet etj.), do të 
ishte më lehtë i kthyeshëm në një gur shahu në duart e kryeministrit-zyrtar 
tamam ashtu siç e kanë qejf shumë diktatorët.  Prandaj dhe rregullat e lojës 
demokratike, që jemi detyruar të fusim edhe ne në legjislacionin tonë, u 
kanë siguruar imunitetin zyrtarëve të lartë të shtetit, e përsërisim: që ata 
mos të tremben nga diktatorët që mund t'u qëllojë të kenë mbi krye.

Edhe një hollësi formale.  Me ligjin tonë, nëpunësi me imunitet, nuk ia heq 
dot vetes imunitetin, sado që të bëjë "trimin", sado që "ta kërkojë vetë". 
Konkretisht imuniteti i hiqet ministrit vetëm nga Kuvendi, sipas kërkesës së 
Prokurorisë, dhe jo sipas kërkesës së vetë ministrit.  Edhe ky rregull 
formal, shërben për të garantuar një ministër trim, dhe jo servil të 
kryeministrit.

Nga ana tjetër, nëse ministri dyshohet fort për fajtor, është Kuvendi që 
duhet t'i heqë imunitetin.  Po si i bëhet hallit, kur Kuvendi nuk pranon t'i 
heqë imunitetin, sepse shumica e tij mbron ministrin fajtor?  Edhe po të 
ndodhte kështu, zgjidhja nuk do kërkuar në improvizime jashtëligjore, si kjo 
"vetëheqja e imunitetit".  Forcat e interesuara për vendosjen e drejtësisë 
duhet të vazhdojnë përpjekjet e tyre për drejtësi, sipas rregullave të 
lojës: sqarimi i opinionit publik, sqarimi i deputetëve të ndershëm, 
protestat publike, kërkesa për zgjedhje të parakohshme që të hiqen ministrat 
me gjithë kryeministrin etj. etj.

Janë naive, por edhe shumë të rrezikshme, këto improvizimet me zgjidhje me 
thyerje të ligjit, apo ç'është më e keqja, me ndryshime ligjesh, të 
justifikuara që "i miri" të mund t'i heqë imunitetin "të keqit".  Kjo 
zgjidhja me ndryshimin e ligjeve të imunitetit, u pat kërkuar me insistim 
nga kryeministri aktual, sapo mori karrigen.  Ai dështoi, dhe ligjet nuk u 
prekën-dështimi i heqjes së imunitetit, qe një shpresë se institucionet tona 
demokratike nuk janë tashmë dhe aq të dobëta, sepse as z. Berisha nuk i 
shkatërroi dot.

A mos është halli gjetiu, tek heqja njëherë e mirë e imunitetit?  A mos ajo 
që kryeministri nuk arriti dot ballë për ballë, po tenton ta realizojë tani, 
me këtë lojën që "për inati" të një ministri, opozita të bjerë dakord që të 
ndryshohen ligjet, që t'u hiqet imuniteti "të gjithëve"?!  Kush janë kësaj 
radhe "gjashtëshja" e opozitës në shërbim të kryeministrit, që përbën 
kolonën e peste të kryeministrit, tek opozita?!  Nejse, kjo është temë për 
një analizë tjetër.


Zbatimi i ligjit

Nëpunësi i shtetit është përgjegjës individualisht për shkeljen e ligjeve. 
Ai duhet të zbatojë ligjin, dhe jo urdhrat antiligjorë të eprorëve të tij. 
Por, në këtë "çështjen e Rrugës", nxjerr krye edhe një koncept i trashëguar 
nga regjimet diktatoriale: "nuk kanë faj nëpunësit e shkretë, se i ka 
urdhëruar ministri, apo kryeministri".

Drejtësia do të japë një kontribut të madh, nëse vë para përgjegjësisë, dhe 
edhe i dënon nëpunësit "e vegjël" që kanë bërë veprime në kundërshtim me 
ligjin.  Do të mbillej frika se "e ha" (dënohesh), po shkele ligjin, sado që 
ta kesh mbajtur mirë me eprorin.  "E frika ruan vreshtat", pra frika do të 
bënte që të kemi një nëpunës shtetëror që zbaton ligjin.  Nëpunësi duhet te 
ketë më shumë frikë nga moszbatimi i ligjit, sesa nga moszbatimi i urdhrave 
në kundërshtim me ligjin, të marra nga eprori i tij "me imunitet". 
Moralistëve, atyre që duan "nëpunës të ndërgjegjshëm jo nga frika", ju themi 
që të mos merakosen, se pas mësimit nga frika, vjen edhe ndërgjegjja, 
edukata e respektit për ligjin!  E ajo që ka më shumë nevojë urgjente 
shoqëria jonë aktuale, është pikërisht pasja e nëpunësve që zbatojnë ligjin.

E duket se çështja e Rrugës, nga ana juridike është fare e lehtë për t'u 
zgjidhur.  Ato "18 shkeljet" e saj, janë kryer nga nëpunës konkretë, të 
cilët kanë lënë gjurmë, qoftë "duke vënë firma", qoftë dhe duke vepruar "pa 
pasur firmat".  Legjislacioni ynë nuk ka të shkruar asgjëkund, se "po tha 
eprori të shkelësh ligjin, shkele".  Në këto kushte, drejtësia mund t'i 
dënojë fajtorët pa imunitet.  Fajtorët me imunitet le të dënohen kur t'u 
vijë radha-theksojmë se dënimi i vartësve të tyre, ua shpejton fundin edhe 
atyre vetë.  Pra, Prokuroria duhet të vazhdojë punën e saj, pa e ndërprerë 
hetimin, edhe nëse Kuvendi refuzon kërkesën eventuale për heqje imuniteti. 
Le ta zënë se "i pandehuri me imunitet vrau veten"-që mos qoftë e thënë.

Nëse Prokuroria dhe Gjykata, nuk kryejnë detyrat e tyre, "gjoja se nuk 
punuakan dot pa hequr imunitetet", atëherë formojmë bindjen se ato po 
nxjerrin bidate të tilla, ose për të justifikuar frikën e tyre nga politika, 
ose, ç'është dhe më keq, sepse janë të lidhura me krimin politik.

Gjithsesi, ndërtimi i Rrugës duhet të vazhdojë pa u influencuar nga hetimet 
e gjykimet përkatëse, sepse kjo rrugë është me rëndësi shumë të madhe për 
kombin tonë: llogaritë me firmat që po punojnë, mund të mbyllen në fund të 
ndërtimit të saj!


Bashkim Kopliku
15.9.2007

Phone: +355 52 23663
Mob: +355 0682200590
Email: <[email protected]>
optional: <[email protected]>