[AlbClub] Falimentuesit e HEC-eve, të procedo hen

                  *** AlbClub Discussion List ***






Falimentuesit e HEC-eve, të procedohen
[Gazeta Shqiptare, 28.9.2007]

Nëpunësit e shtetit paskan falimentuar HEC-et e vogla private.  Kjo doli e 
qartë nga deklaratat publike të ministrit Genc Ruli, në një emision 
televiziv natën e datës 19.9.2007.  Nuk u paskan paguar energjinë që iu kanë 
marrë këtyre HEC-eve private.  "E pohojnë me gojën e tyre", "sabotatorët e 
ekonomisë", "fajtorët në litar", thoshin në komunizëm-shyqyr që iku ajo 
kohë, dhe ne e kemi hequr dënimin me vdekje.  Por ama, në çdo shtet 
demokratik normal, nëpunësit e shtetit që janë fajtorë, duhet të dënohen për 
fajet që kanë kryer.  Kjo duhet të bëhet edhe nga shteti ynë-përndryshe, po 
dënuam vetëm "ata të tenderave të rrugëve", sepse ata qenkan "të PDK-së, dhe 
jo të partisë sonë", kurrë nuk do të bëhemi shtet evropian.

Ministri foli atë natë, pa i luajtur qerpiku, sikur të fliste për probleme 
të Bangladeshit, dhe jo për neglizhenca të tijat personalisht, me pasoja 
katastrofike për vendin e vet: na la pa elektrik, i shkaktoi ekonomisë 
humbje prej miliona dollarësh, dhe edhe falimentoi bizneset e HEC-eve. 
Etatizmi i këtij ministri, pak dallon me atë të një ministri të kohës së 
komunizmit, kur çdo gjë do ta zgjidhte shteti dhe vetëm shteti.  Bile ky 
ministri aktual i elektrikut, paskësh qenë aq injorant, saqë "nuk dallonte 
dot kilovatët nga kilovatorët", siç e "pohoi me gojën e tij", po atë natë, 
po në atë emision.  Edhe atë natë, na e kishte lënë pa elektrik edhe lagjen 
tonë, por ne arritëm ta shihnim spektaklin e tij televiziv, në sajë të një 
invertitori dhe të baterive, që shumicës së shqiptarëve nuk ua kërcet dot t'i 
blejnë.  Po le të përqendrohemi për sa u tha atë natë, për HEC-et private.

Ja dëshmia e ministrit: "Veprimtaria më intensive e ministrisë këto 6 muajt 
e fundit, ka qenë marrja me HEC-et e vogla.  Ato mund të jepnin një energji 
sa gjysma e TEC-it që do të ndërtohet në Vlorë.  Jemi marrë jo që në fillim 
të qeverisjes, pra jo që para dy vjetësh, sepse në fillim u bë ndryshimi i 
ligjit të koncensioneve, sepse e gjithë praktika me koncensionet nuk ka 
ecur, e prandaj duhej bërë një ligj normal.  HEC-et kishin shumë probleme me 
KESH-in [Korporatën Elektroenergjetike Shqiptare-sh.y.] .  Kështu KESH nuk u 
paguante energjinë që u merrte HEC-ve private  Pra as që mund të flitej "për 
stimulime" të HEC-eve.  Për ndryshimin e ligjit, kemi marrë shembullin e 
Maqedonisë, Austrisë etj.  Ligji do të krijojë një kuadër rregullator që do 
të lejojë shpejtësi në dhënien e koncesioneve për HEC-et., por edhe 
realizimin e investimeve të qëndrueshme.  Këto 6 muajt e fundit, në ministri 
ka pasur rreth 100 kërkesa për privatizim të HEC-eve, qoftë nga vendas, 
qoftë dhe nga të huaj.  Nga këto, 20 kanë përfunduar procedurat, dhe janë në 
fazën e lidhjes së kontratës.  Ndër kohë ministria po eksploron burimet 
ujore.  Tashmë praktika e dhënies së koncesioneve është konsoliduar më së 
miri.  Së shpejti do të garantohet me ligj që energjia do t'u blihet HEC-ve 
me çmim të fiksuar, e që do të jetë sa mesatarja e çmimit të importit."

Tmerr!  Ky ministër paska dy vjet që nuk u paguan pronarëve të HEC-eve 
paratë për energjinë që u merr; le pastaj zvarritjet me vite për një palo 
amendament ligji; apo sorollatjet që u bën investitorëve, me muaj të tëra, 
për t'u dhënë aprovimet nga ministria; apo u marrkan prapë me "rezervat 
ujore" për të cilat mund të ketë mijëra faqe studime, që në kohën e mbretit 
Zog!  Po le të mbetemi tek HEC-et: si mund të mbijetojnë ato biznese të 
HEC-eve, po nuk u dhanë paratë për mallin që u marrin?!  Del e qartë se 
ministri me të vetët i paska falimentuar, se çdo biznes në Botë falimenton, 
nëse nuk paguhet për mallin që shet.

Vetëm kjo që dëgjuam atë natë, do të mjaftonte që ky ministër të hiqet 
urgjentisht nga detyra, dhe të procedohet (të ndiqet penalisht), t'i lihet 
drejtësisë që të përcaktojë se përse nuk ka bërë rregullimin e gjendjes 
brenda "dite", por e ka lënë për dy vjet zvarrë-zvarrë, pikërisht ministri 
në krye të politikave të elektrikut.  Me të duhet të hiqen edhe nëpunësit e 
tjerë fajtorë, duke përfshirë edhe zëvendësministrin e tij, që na mbushte 
një faqe gazete, para ca ditësh, me sofizma se "nuk ecka privatizimi i 
HEC-ve në Shqipëri, e se do të bëka ky zëvendësi, ca shpikje  botërore, tip 
"ecje në shtigje të pashkelura", kur ndërkohë na fshihte kryesoren, se ai 
vetë paska qenë bashkëfajtor për mosecjen e HEC-ve.   Këta nëpunës duhet të 
procedohen njësoj, pavarësisht "se janë të Berishës", dhe nuk janë ata "të 
Nard Ndokës"-bile dëmi që i kanë shkaktuar këta vendit, me mossigurimin e 
energjisë elektrike, është disa here më i madh se ryshfetet e përfolura për 
ata tenderave të ca rrugëve!

"Po edhe në kohën e Fatos Nanos kështu ishte!", do të hidhen disa.  Do t'u 
themi: "Faji i ministrit "të Berishës", nuk zvogëlohet nga fakti se ka edhe 
ministra "të Nanos" që janë fajtorë; le të gjykohen njësoj të gjithë".  Nuk 
do të kemi kurrë nëpunës shtetërorë eficientë, nëse nuk dënojmë paraardhësit 
për fajet e kryera.

Atyre që do të vijnë, ministrit të ri dhe stafit të tij, do t'i 
rekomandonim: "Mos u hallakatni, menjëherë jepuni privatëve të gjithë HEC-et 
e TEC-et, të mëdhenj e të vegjël, duke u garantuar një ambient biznesi 
normal, një çmim shitje normal, të rregulluar nga ERRE (Enti Rregullator i 
Energjisë elektrike).  Hiqeni shtetin nga biznesi i elektrikut (nga 
mikroekonomia e tij).  Vetëm privati mund të jetë një administrator 
eficient, e kurrë nëpunësi ynë shtetëror."


Bashkim Kopliku
23.9.2007


Bashkim Kopliku
Phone: +355 52 23663
Mob: +355 0682200590
Email: <[email protected]>
optional: [email protected]