[AlbClub] Fw: Ekonomia, ekstrem i majtë

                  *** AlbClub Discussion List ***




Ekonomia, ekstrem i majtë
[Gazeta Shqiptare, 20.07.2007]

Ministria shqiptare e ekonomisë (emërtimi i gjatë: "ministria e ekonomisë, 
tregtisë dhe energjetikës") duhet të jetë kampionia evropiane e politikave 
të majta ekstreme.  Këto politika gjenerohen nga ministri Genc Ruli, duke 
marrë bekimin e kryeministrit.  Majtizmi ekstremist i tyre, ka një shtrirje 
të gjerë, që nga mosprivatizimi i elektrikut, tek shtyrja prej dy vjetësh e 
privatizimit të Telekomit, e deri tek kjo e fundit, mbyllja me mburrje e "54 
minierave", duke lënë pa punë me qindra vetë.

Nga ky ministër kemi vetëm teori dhe praktika etatiste me theksime 
merkantiliste, të huazuara nga mesi i shekullit të kaluar (bile dhe më 
herët, që nga shekujt e XVII e XVIII), që edhe e majta moderne, pra partitë 
socialiste dhe social demokrate evropiane, ka kohë që i ka hedhur poshtë  Ka 
dhjetëra vjet që është provuar katërçipërisht, se etatizmi merkantilist, nga 
njëra anë, ka shpënë në mjerimin e vendeve që e adaptuan, dhe nga ana 
tjetër, ka siguruar pasurimin korruptiv të nëpunësve të shtetit.  Shembuj të 
zbatimit të këtyre teorive, i gjen me shumicë në historinë e politikave të 
disa vendeve të Amerikës Latine, të para 50 vjetëve.  Por sot është zor të 
gjesh një ministër të dytë, që të ketë këto koncepte-mbase ka akoma ndonjë 
të ngjashëm, vetëm në Bjellorusi, apo në Korenë e veriut.  Tek ne, rezultati 
i dukshëm lehtë, i këtyre doktrinave dhe praktikave, është lënia pa drita, 
pa ujë, pa punë, me zhvillim të frenuar, të shtresave të gjera të  popullit, 
e të të gjithë  ekonomisë.


pa drita

U bllokua privatizimi i elektrikut, duke lënë të menaxhojë atë, zyrtarë të 
shtetit.  Sado të punojnë me ndershmëri drejtorët e KESH (Korporata 
Energjetike Shqiptare), qoftë z. Beli, nga zyra e tij, e qoftë sot z. 
Bojaxhiu, në terren e me ndershmëri dhe eficiencë të padiskutueshme, nuk 
ndryshon gjë: dihet se nuk do t'ia dalin dot të bëjnë eficient një gjigant 
të kalbur nga korrupsioni dhe ineficienca, siç është KESH.  Vetëm 
privatizimi tërësor i elektrikut, do të sigurojë energjinë elektrike, 
"dritat", në Shqipëri.  Natyrisht, fajtori i mosprivatizimit, është 
politik-bërësi, personi politik në krye të ministrisë nga varet KESH, 
ministri i ekonomisë.  Ai ka një çadër mbi të, kryeministrin, të cilit i 
duhet KESH shtetëror, ani se shqiptarët rrinë pa drita: aty, në KESH, futen 
në punë me qindra e mijëra militantë të berishizmit, të cilët janë 
komandantët dhe ushtarët e skalioneve që i sigurojnë votat kryeministrit.  E 
për votat është i babëzitur kryeministri ynë aktual, siç janë të babëzitur 
për paratë, të korruptuarit e tjerë.  Ky bllokimi i privatizimit, 
mbështillet me slogane merkantiliste: "ta prodhojmë energjinë në vend, duke 
shkurtuar importin" (import-substitution policy).


celulari, më i shtrenjti

U zgjat "edhe dy vjet" futja e operatorit të tretë të telefonisë celulare, e 
Eagle Mobile (celulari që është pjesë e privatizimit të Telekom).  U zgjat, 
sepse u shty privatizimi i Telekomit.  Ajo që ra në sy menjëherë, është 
fakti se iu dha mundësi administratës shtetërore të lidhur me Telekomin, të 
abuzojë edhe dy vjet të tjera, me blerjet e saj absurde prej miliona 
dollarëshe, për të cilat përfliten jo vetëm "10%-shat" e tenderave të kaluar 
në xhepat e zyrtarëve të shtetit, por një pafundësi abuzimesh të tjera.  Pra 
nuk po hyjmë në hollësitë e abuzimeve në Telekom, as në hollësitë e pagesave 
marramendëse për "analiza financiare" të firmave audituese "të privatizimit 
korruptiv të Telekomit nga socialistët",  apo të ofertave relativisht më të 
leverdishme të "një firme gjermane" që donte të blinte Telekomin etj.: për 
to ka folur mjaft masmedia, dhe thuhet se tani po merret me to edhe 
prokuroria.  Po theksojmë vetëm çështjen e celularit.  Kjo zgjatje e 
privatizimit të Telekomit, lidhet ngushtë me fitimet e tepërta 
monopolistike, prej miliona dollarësh, të dy kompanive Vodafone dhe AMC, të 
cilat me  "dorëshpuarsinë" e tyre sponsorizuese, nuk do të kenë lënë pa 
shpërblyer si duhet, edhe ata që ua siguruan "këto dy vjetët monopol". 
Natyrisht, pagesat korruptive bëhen me paratë tona, që paguajmë tarifat më 
të larta të celularit, në Botë.


Parazitizëm, magazina tregtare shtetërore

Ministri akoma po mban shtetërore deri dhe "bazat e Shkozetit Durrës", ca 
magazina tregtare që të merr vaji t'i shohësh, por që kanë brenda tyre, me 
qindra vetë që zhvatin rroga e përfitime të majme.  Sot, 17 vjet pas 
komunizmit që i sajoi, ato akoma "janë në pronë shtetërore dhe menaxhohen 
nga shteti", kur "shoqet" e tyre jashtë tutelës së Ministrisë së dikurshme 
të tregtisë, u patën privatizuar "brenda dite", që në vitin 1993. 
Natyrisht, lihen shtetërore për të mbajtur në punë miqtë parazitë të 
ministrit me shokë-por mos harroni se jemi gjithnjë ne shqipot, që paguajmë 
për to, jo ministri.


rishtetËzime dhe papunËsi

U mburr ministri se iu hoqën licencat në bllok, "54 kompanive private të 
minierave", ndër kohë që pritnim të kundërtën: privatizimin e gjithë 
minierave të tjera.  Kinse iu hoqën licencat, për të ruajtur jetën e 
minatorëve!  Po ku i dërguan këta minatorë, kujt ia lanë në dorë këto 
miniera? Minatorët i lanë në listat e njerëzve që lëngojnë në asistencë, në 
papunësi, natyrisht prapë duke marrë nga xhepat tona të shpuara.  Minierat i 
lanë në duar të shtetit, të ministrisë së ekonomisë!  Praktikisht ministri 
po nacionalizon ekonominë, po shtetëzon minierat, gjë që është një politikë 
tipike majtiste ekstremiste, dhe edhe merkantiliste.  Çdo ministër tjetër në 
Botën e sotme, i djathtë apo edhe i majtë, do të merrte të gjitha masat, jo 
vetëm që kushtet e sigurisë në punë në këto "54 miniera" të përmirësohen, 
por edhe që puna në to të ecë përpara, si për të mirën e minatorëve, si dhe 
për të mirën e pronarëve të tyre.  Bile, çdo ministër tjetër, do të punonte 
gjithë ditën, që të privatizohen të gjitha minierat e tjera, ato që po 
shkatërrohen prej vitesh, në "konservimet" (bllokimet pa punë) e ministrisë 
së ekonomisë.


Aspak liberalizim

Sot, në vitin 2007, nga një ministri ekonomie e Shqipërisë, duhet të kishim 
dëgjuar vetëm për liberalizim të ekonomisë, për privatizimin e çdo gjëje që 
diku në Botë është private, për derregullimin (heqjen e rregullimeve 
shtetërore), për rregullimin jokorruptiv të bizneseve monopolistike, për 
thjeshtimin e licencimit të aktiviteteve private, për rritjen e eksportit si 
rezultat i rritjes së cilësisë, për heqjen e barrierave të hyrjes, për 
globalizmin etj.  Por jo, dëgjojmë të kundërtën: vetëm teori e praktika 
etatiste, përqendrim të çdo gjëje në duart e ministrisë (bile në duart e 
vetë ministrit personalisht), licenca që kalojnë nëpër duart e ministrit, 
sorollatje të investitorëve etj. etj.  Ministri aktual tani na rezulton më 
etatisti i historisë post-komuniste shqiptare: edhe teorikisht, edhe 
praktikisht-në fakt, merkantilizmi i tij, është në koherencë të plotë me 
populizmin e kryeministrit aktual.

Ky realitet na bën shumë pesimistë për të ardhmen e pjesës më të madhe të 
ekonomisë shqiptare, për mirëqenien tonë.

Bashkim Kopliku
19.10.2007


Phone: +355 52 23663
Mob: +355 0682200590
Email: <[email protected]>
optional: <[email protected]>

Please, send important e-mails
on both addresses. 

______________________________________________________________
If you wish to unsubscribe, send a blank message to:
[email protected] , or visit Alb-Club's page at:
http://www.alb-net.com/mailman/listinfo/alb-club