[AlbClub] E gjitha, për gllabërimin e Top C hannel

                  *** AlbClub Discussion List ***




E gjitha, për gllabërimin e Top Channel
[Gazeta Shqiptare, 7.6.2008]

Gjithë ajo potere, në ditë gjëme.  Kryeministri ynë mbetet protagonisti i 
ngatërresave, edhe tek vdekjet.  Kështu ndodhi edhe me vdekjen e Dritan 
Hoxhës, të krijuesit dhe drejtuesit të Top Channel.  Me që nuk di te 
ngushëllojë, së paku të merrej me përgjegjësitë që ka si kryeministër, që po 
i rriten përditë aksidentet automobilistike, e jo që ditën e vdekjes, të 
merret me sajime diversionesh për interesat e tija meskine të mbajtjes me 
dhëmbë të pushtetit.  Duket se provoi të gllabërojë TCH, por nuk i eci-është 
një fat që gruaja e Dritan Hoxhës, do ta ruajë televizionin nga grabitja.


Meritat

Me Dritan Hoxhën iku një personalitet që arriti që në mishmashin shqiptar, 
të ngrejë një televizion të përmasave evropiane.  Pak kush tjetër ka arritur 
këto vjet, këto maja.  Nuk e kam njohur personalisht Dritan Hoxhën, por kam 
njohur produktin e tij: Top Channel, që ka mbushur shtëpitë e shqiptarëve me 
të vërteta, me humor, me ndjenjën që nuk po të ngopin në rrena, që nuk është 
i shitur, por është "kokë në vete".  Kontrasti i tij bëhet më i madh, kur 
sheh rrotull mjerimin e shumë mediave të tjera që janë bërë të pështira në 
servilosjen dhe shërbimin prej lakeu (shërbëtori), që i bëjnë pushtetarit të 
radhës.

Është krejt e përligjur, krejt etike dhe krejt e moralshme, që ikja e një 
njeriu të tillë, të shoqërohej me atë përcjellje madhështore që iu bë nga 
kolegët, nga shumë politikanë, nga njerëz të medias, si dhe nga njerëz të 
thjeshtë.  E ç'është më e pastra dhe më moralja, po nderohet një njeri, kur 
tashmë "nuk ka më gjë në dorë"!

Nuk është e lehtë në Shqipërinë tonë aktuale, të nderosh vdekjen e një 
njeriu që nuk është servil i kryeministrit.  Të shkruhet emri në listat e 
zeza të kryeministrit, dhe do të paguash shtrenjtë, ti dhe të tutë: me heqje 
nga puna, me nota të këqija në mësime për fëmijët, me mosdhënie lejesh e 
licencash për biznese, me dërgim tatimesh arbitrare tek biznesi, me humbje 
tenderësh, me izolim nga shoqëria, etj. etj.  Çdokush që ka dy pare mend i 
di të gjitha këto, sepse i sheh të ngjasin përditë.  Natyrisht, akoma nuk 
pushkatohet e burgoset njeri, si në kohën e Enver Hoxhës, sepse "është 
jashtë mode", tani për tani.


Faji

Por duhet të mësohemi të respektojmë ligjin në çdo moment, njësoj për këdo, 
edhe për të dashurit tonë: është kërkesa elementare që të bëhemi edhe ne me 
një shtet.

Dritan Hoxha po ecte në shkelje të rregullave të qarkullimit, atë natën e 
aksidentit-siç ecim shpesh edhe ne që po shkruajmë; siç shihet të ecin, edhe 
"ditën për diell", shumë makina të tjera, e në mes të kryeqytetit. 
Shpejtësia e lejuar në qytet, është 40 km/orë, e Dritani, sipas ekspertizës, 
ishte mbi 170 km/orë.  Pra ishte në shkelje të ligjit, ishte me faj.


Përgjegjësia e qeverisë

Por qeveria ka përgjegjësi për aksidentet që janë shtuar në vendin tonë. 
Nëse do të kishte vendosur një zbatim më të mirë të rregullave të 
qarkullimit, aksidentet do të ishin ulur.

Më konkretisht.  Nëse Dritan Hoxha, gjatë gjithë këtyre viteve që ecte shumë 
shpejt me makinë, do të ishte ndaluar disa herë nga policia rrugore, duke u 
gjobitur, hequr patenta etj., ai sot do të ishte gjallë.  Natyrisht, e 
njëjta gjë mund të thuhet edhe për qindra njerëz të tjerë, që vdesin a 
lëndohen rrugëve tona.

E pra kryeministri ynë, nuk do e nuk di t'i bëjë këto analiza të thjeshta, e 
të përmirësojë qeverisjen.  Ai bën të kundërtën: mbjell frymën e 
moskokëçarjes për mirëqeverisje, duke orientuar të gjithë shtetin, çdo 
hallkë të tij, vetëm në sigurimin e pushtetit.  Në administratën shqiptare, 
posti i punës sigurohet jo mbi bazën e kryerjes mirë të detyrave, por mbi 
bazën e "qëndrimit politik": "je apo nuk je me Salën".

Por çfarë mund të bënte një kryeministër që i qanë vërtetë mendja për 
qytetarët e vet, e konkretisht për uljen e aksidenteve të qarkullimit 
rrugor?  Puna më e thjeshtë është të detyrojë policinë rrugore të zbatojë 
ligjin, rregulloren e qarkullimit.  Nëse sheh se ministri i brendshëm nuk ka 
rezultat në punë, e shkarkon-po ecin makinat në mes të kryeqytetit me 
shpejtësi skëterre.  Pastaj masat vijnë me radhë: ministri shkarkon shefin e 
qarkullimit të Tiranës, që nuk ka marrë masa që të mos qarkullohet kaq keq; 
shefi i qarkullimit shkarkon nga puna patrullat e policisë të asaj nate, në 
atë zonë, që nuk kanë raportuar se një makinë me targën kaq e aq po 
qarkullon me shpejtësi etj. etj.

Nuk dëgjuam të jetë marrë asnjë nga këto masa, si reagim i qeverisë për 
aksidentin e ndodhur në mes të Tiranës.  Nga ana tjetër, dëgjuam 
kryeministrin të përzihet në punët personale e familjare, të njerëzve në zi.


Intrigat

Kryeministri nuk e ha fare meraku, se "nuk u përsërit nga disa media, lajmi 
se kush ishte në makinë".  Ai thjesht shfrytëzoi momentin që të shqetësojë 
gruan dhe fëmijët e të vdekurit, pikërisht në ditët e zisë.

Kryeministri nuk e ka fare hallin, as tek hakmarrja ndaj Dritan Hoxhës, që 
pati deklaruar në fushatën zgjedhore të 2005-ës: "jam me të djathtën, por 
kundër Sali Berishës".  Jo, e ka vërtetuar kryeministri ynë aktual, se ai i 
lëpihet kujtdo, sado që mund t'i jetë kundërvënë atij, shumë më rëndë se iu 
pat kundërvënë Dritani: mjafton t'i duhet për mbajtjen e pushtetit, dhe 
lëpihet që ç'ke me të, pa pikë zori.

E vetmja gjë logjike, është se kryeministri e ka me median në përgjithësi, 
dhe në veçanti me Top Channel të cilin do ta gllabërojë, siç e ka bërë me sa 
e sa media të tjera.  Prandaj po i thotë familjes së Dritanit: "shokët e 
Dritanit janë të këqijtë, si Dritani, unë jam më i mirë, prandaj ma shitni 
mua, ose të mive, televizionin tuaj".

Por nuk i eci intriga me gazetarët.  Ata janë indinjuar nga ky keqpërdorim 
që u bën kryeministri, dhe dolën me një deklaratë të qartë dhe dinjitoze.


Një grua e hekurt?!

Por edhe gruas së Dritanit, nuk po ia hedh dot kryeministri ynë.  Flitet se 
zonja Hoxha është një grua e fortë ("e hekurt"), e me karakter, që nuk ia ha 
qeni shkopin.  Flitet se menjëherë ka bërë mbledhjet e para të punës, duke 
premtuar se do të vazhdojë punën e Dritanit, burrit që ajo e ka dashur dhe 
respektuar.

Ajo zonjë po i bën një nder të madh Shqipërisë, duke e ruajtur Top Channel 
të pavarur nga partitë politike, apo nga kryetarët e tyre.  Një kolos 
mediatik i pavarur, i duhet shumë tani vendit.  Shqipëria duket se po hyn në 
një periudhë furtune politike, që po paralajmërohet nga disa erëra Lirie që 
po ndjehen edhe nga brenda kampit berishist: Presidenti Topi dhe 
kryeprokurorja Rama, e nga ana tjetër, kryeministri Berisha dhe kryetarja 
Topalli, po agjitojnë kundër njëri-tjetrit.  Kryeministri po sheh rrezikun 
se mos e heqin, prandaj do bërë kujdes nga të gjithë shqiptarët e të huajt. 
Eksperienca e kaluar (viti 1996), tregon se kur ndjen rrezikun e humbjes së 
karriges (pushtetit), Ai nuk ndalon para asgjëje.  E dogji një herë 
Shqipërinë, në 1997-ën, e është turp ta lëmë ta bëjë prapë.


Bashkim Kopliku
6.5.2008

Phone: +355 52 223663
Mob: +355 682200590
Email: <[email protected]>
optional: <[email protected]>

Please, send important e-mails
on both addresses. 

______________________________________________________________
If you wish to unsubscribe, send a blank message to:
[email protected] , or visit Alb-Club's page at:
http://www.alb-net.com/mailman/listinfo/alb-club