[AlbClub] Rritja e akcizave: ekstremizëm i maj të

                  *** AlbClub Discussion List ***




Rritja e akcizave: ekstremizëm i majtë
[Gazeta Shqiptare, 26.12.2007]

Po u rritkan akcizat e llambave inkandeshente, nga zero, në 100%.  Edhe 
akcizat e karburanteve do të rriten, por gjithnjë duke mbajtur "me hatër" 
prodhimin vendas.  Me demek, e para u bëka që të frenohet përdorimi i 
llambave inkandeshente, sepse janë joekonomike, krahasuar me llambat 
ekonomike (fluoreshentet etj.).  E dyta, duket se bëhet thjesht për t'i 
marrë lekë shqiptarëve.  E treta, gjoja bëhet për të mbrojtur prodhimin 
vendas, natyrisht në kurriz të xhepit të gjithë vendasve, shqiptarëve.  Të 
gjitha këto, të vendosura për një ditë, janë vendime që sot nuk do t'i 
merrte as edhe një parti e majtë e qendrës, pra as më PS-ja e sotme, siç 
duket se po e reformon kryetari i saj Rama.  Këto vendime mund t'i marrë 
vetëm një parti e ekstremit të majtë, siç e ka katandisur PD-në e sotme, 
kryetari i saj Berisha.  Duhej bërë e kundërta: akciza e llambave të mbetej 
zero, akciza e karburanteve të ulej deri në zero, duke unifikuar me këtë 
rast akcizën e karburanteve të vendit me ato të importit.  Po i marrim me 
radhë të tri rastet e mësipërme.



e përbashkëta

Për të tri rastet që do të diskutojmë, mbetet e përbashkët sa vijon.  Kjo 
qeverisje ka maninë etatiste (të ekstremit majtist) që të marrë sa më shumë 
para nga xhepat e shqiptarëve, me pretendimin se ajo di t'i shpenzojë paratë 
tona më mirë se secili prej nesh veç e veç, pra më mirë se privatët: e keni 
dëgjuar qeverisjen aktuale, sesi mburret gjithë ditën e natën, se e ka 
rritur vjeljen e parave për në buxhetin e shtetit, krahasuar me vitin kaq 
apo aq?!  Pra këto rritje akcizash, mund të jenë thjesht një mënyrë 
bizantine për të rritur të ardhurat në buxhet, duke rritur taksimin me 
akciza-jemi hasur vazhdimisht, këto dy vjet, me skuthllëqe të tilla.

Tani le të kalojmë në analizën rast pas rasti.


Llambat inkandeshente

Gjithë bota po e redukton përdorimin e llambave inkandeshente, bile deri në 
zhdukje fare, duke i zëvendësuar me llamba ekonomike.  Arsyetohet si vijon:

"Llambat ekonomike, për të njëjtën sasi ndriçimi, kërkojnë rreth "4-5 herë" 
më pak energji elektrike sesa llambat inkandeshente.  Si rrjedhojë, duke i 
zëvendësuar llambat inkandeshente, kursehet rreth "75-80%" e energjisë 
elektrike."

Qëllimi i zvogëlimit të përdorimit të llambave inkandeshente, është i 
drejtë, pavarësisht se në rastin tonë, të Shqipërisë, arsyetimi i mësipërm 
nuk është tamam ashtu, gjë që do ta shpjegojmë më poshtë.

Mjeti që po përdoret nga qeverisja (qeveria, kuvendi etj.), "vendosja e 
akcizës 100%", nuk është i drejtë.  Kjo akcizë do të rritë deri dy fish, 
çmimin e tregut të llambave inkandeshente, dhe njëkohësisht do të rritë edhe 
çmimin e llambave ekonomike, sepse do të rritet shumë kërkesa për to 
(njerëzit do të detyrohen të blejnë llamba ekonomike)-fatmirësisht nuk kemi 
"mbrojtje të prodhimit vendas" edhe për llambat ekonomike, kështu që rritja 
e çmimit të tyre nuk do të jetë deri dy fish.

Rruga e drejtë, ajo që po përdorin edhe shtete të tjera, është si vijon. 
Bëhet punë bindëse me konsumatorët, për leverdinë e zëvendësimit të llambave 
inkandeshente, dhe nëse dëshirohet që të shtohet shpejtësia e bindjes, 
atëherë bëhet subvencionim i llambave ekonomike.  Pra shteti nuk bën 
politikë që të rritet çmimi i llambave, por bën të kundërtën: bën politikë 
që të ulet çmimi i llambave ekonomike.  Në rastin e Shqipërisë, ne do të 
thoshim që duhet bërë vetëm punë bindëse, dhe as subvencionim, dhe as 
vendosje akcizash.

Duhet theksuar, se shteti shqiptar duhet të bëjë edhe një punë shumë të 
rëndësishme, para se të marrë yrysh me futjen në masë të llambave ekonomike: 
të eliminojë rrezikun nga zhiva që përmbajnë këto llamba.  Ka kërkesa të 
veçanta për riciklimin e tyre: në botë, llambat ekonomike të prishura, 
trajtohen në mënyrë të veçantë.  Por tek ne, deri tani llambat hidhen në 
plehrat e zakonshme, dhe në rastin më të mirë, përpunohen me landfill 
(mbulim me dhe), gjë që paraqet rrezikun e kalimit të avujve të zhivës në 
ujë dhe edhe në ajër.  Nuk dimë t'i ketë hyrë njeri një studimi të këtyre 
problemeve nga ana e mbrojtjes së ambientit, në Shqipërinë tonë të dashur.

Mos të ngutemi shumë, sepse Shqipëria ka specifikat e saja negative.  E 
para, në kohën e ftohtë, energjia e llambave inkandeshente nuk humbet e 
gjitha, sepse një pjesë shkon për ngrohjen e ambienteve, kurse në kohën e 
ngrohtë, nuk është se ngarkon më tej kondicionerët, sepse përdorimi i tyre 
tek ne është i kufizuar.  Gjithashtu, mos të harrojmë se cilësia e tensionit 
elektrik, tek ne është skandaloze: në tensionin e ulur tej normave, që është 
gjëja më e zakonshme tek ne, llambat ekonomike punojnë shumë keq, prandaj 
nganjëherë bëhet e domosdoshme përdorimi i llambave inkandeshente.

Mos na del edhe kjo puna e llambave, si ato shpikjet e komunizmit, p.sh. ajo 
që "t'i zëvendësojmë lopët e vendit, me lopë holandeze": ishte një 
katastrofë ekonomike, sepse lopa holandeze, vërtetë nxirrte shumë qumësht, 
por kërkonte kushte mbajtje në stallë, dhe ushqimi shumë speciale, që në 
shumë raste nuk krijoheshin dot në Shqipëri.

Apo mos po lodhemi kot duke analizuar konceptet etatiste të qeverisjes 
aktuale, si dhe gafat tekniko-ekonomike të sajat, kur shkaku i gjithë kësaj 
pune, mund të jetë thjesht tek korrupsioni ekonomik: mos ka dikush interesa 
në rritjen e shitjeve të llambave ekonomike, që po ua rritë çmimin 
llambave?!



Karburantet

Kemi shpjeguar gjatë (GSH, datë 06.12.2007, "Çmimi elektrikut dhe populizmi 
i politikës") se në Shqipëri duhet rritur çmimi relativ i elektrikut, pra 
duhet rritur raporti i çmimit të energjisë elektrike, me çmimin e 
karburanteve.  Mënyra më e mirë e arritjes së rritjes së çmimit relativ të 
elektrikut, është ulja shumë e çmimit të karburanteve, dhe rritja pak e 
çmimit të elektrikut.  Nuk do mend fare të kuptohet, se nëse qeverisja jonë 
do të hiqte akcizat e karburanteve, çmimet e tyre në treg do të uleshin, 
bile mbase me nja 30-40%.  Vërtetë që do të uleshin të ardhurat në buxhetin 
e shtetit, ato që kalojnë nëpër duart e qeverisjes, por ama do të shtoheshin 
paratë në xhepat e shqiptarëve.  Nuk e kemi fjalën tek rritja e të ardhurave 
të shqiptarëve, vetëm direkt nga ulja e çmimit të karburanteve, por edhe nga 
influenca pozitive në të gjithë ekonominë e vendit, që do të kishte një 
zgjidhje e tillë.



PROTEKSIONIZMI

Nuk po e zgjasim, me shpjegime të gjata.  Bërja zero e akcizave, siç 
shpjeguam më lart, e heq edhe të keqen e mbrojtjes së "prodhimit vendas", që 
është, në këtë rast, një reminishencë bolshevike.  Nëse do të shpresonim se 
do të ruanim prodhimin vendas, duke rritur çmimin e karburanteve, do të 
kishim bërë gabim të madh.  Prodhuesit e vendit të karburanteve, le të bëhen 
të zotë, dhe të fitojnë në kushtet e çmimit të tregut, duke hyrë në garë, 
dhe jo duke na vjedhur para nga xhepat tona-apo prapë është puna e buxhetit 
të shtetit, meqë akoma prodhimi i vendit është shtetëror?!  Vdesin këta 
pushtetarët aktualë, "të na bëjnë ndera" me paratë tona!

Nuk po përmendim më "detyrimet nga OBT (Organizata Botërore e Tregtisë)", se 
e bëmë bozë: gjithnjë ankohemi, sikur të ishim askushi, se gjoja na shpien 
"në rrugë të keqe" të huajt!


Bashkim Kopliku
22.12.2007
Phone: +355 52 23663
Mob: +355 0682200590
Email: <[email protected]>
optional: <[email protected]>

Please, send important e-mails
on both addresses. 

______________________________________________________________
If you wish to unsubscribe, send a blank message to:
[email protected] , or visit Alb-Club's page at:
http://www.alb-net.com/mailman/listinfo/alb-club